Lambda Blog

Author: Unuruu Ts

  • Ажил дээрх бүтээмжээ хэрхэн сайжруулах вэ?

    Ажил дээрх бүтээмжээ хэрхэн сайжруулах вэ?

    Бүтээмжтэй ажиллах гэдэг нь цагийг ухаалгаар төлөвлөж, оновчтой ашигласнаар илүү үр дүнтэй ажиллаж, өөртөө чанартай цагийг гаргах чадвар юм. Өдөр бүр хийдэг жижиг гэлтгүй эерэг өөрчлөлтүүд нь ажлын чанарыг сайжруулж, стрессийг бууруулан, таны карьерын өсөлтийг дэмжих түлхүүр болдог. Энэхүү нийтлэлд ажлын бүтээмжээ нэмэгдүүлэх, гүйцэтгэлээ сайжруулахад туслах зарим үр дүнтэй зөвлөмжүүдийг танилцуулж байна.

    1. Өөрийн ажиллах хэв маягийг тодорхойлох

    Юуны түрүүнд 14 хоногийн турш өдөр тутмын ажлын цагийн хуваариа нарийн тэмдэглэж, ямар ажилд хэдэн минут зарцуулж байгаагаа бүртгээд үзэхийг танд зөвлөж байна. Ингэснээр цагаа хэр үр дүнтэй ашиглагдаж байгаагаа хянаж, анализ хийн улмаар цаг хэт их зарцуулж байгаа, эсвэл үр дүн багатай үүрэг даалгавруудыг олж тодорхойлох боломжтой. Мөн хүн бүр өдөрт өөр өөр цагт хамгийн бүтээлч, анхаарал төвлөрөх чадвар өндөр байдаг тул өөрийн хамгийн үр дүнтэй цагийг олж тогтоосноор тэр үедээ хамгийн чухал ажлуудаа гүйцэтгэх нь бүтээмжийг нэмэгдүүлдэг байна.

    2. Хамгийн чухлаа эхэнд нь

    Өдөр бүр хамгийн чухал 2-оос 3 ажлаа тодорхойлж, эхлээд тэдгээрийг дуусгахыг эрмэлзэх нь үр бүтээлтэй ажиллах зарчмын үндэс юм. Энэ арга нь ажлыг орхигдуулж, цаг хугацаа дутуу ашиглагдах эрсдэлээс сэргийлж, стрессийг ч бууруулдаг. Мөн ингэснээр ажилдаа илүү төвлөрөх боломжтой болдог тул өдөр тутмын үүрэг даалгавруудаа амжилттай биелүүлэхэд тустай юм.

    3. Дадал зуршил бий болгох

    Өдөр бүр ижил цагт ажилдаа орж, ижил цагт амрах зуршил бий болгох. Энэ нь тархи, биеийг идэвхтэй ажиллах горимд оруулж бүтээмжийг нэмэгдүүлнэ.

    4. Ажиллах орчныг бүрдүүлэх

    Ширээн дээрээ зөвхөн шаардлагатай зүйлсийг эмх цэгцтэй байрлуулж, хэрэгцээгүй зүйлсээс зайлсхийх нь ажлын үр бүтээмжийг нэмэгдүүлдэг. Байрлах орчноо гэрэлтэй, агаар сайтай, тав тухтай болгох нь анхаарал төвлөрүүлэхэд мөн тустай бөгөөд үүнд цонхны ойролцоо суух, жижиг ургамал тавих зэрэг энгийн шийдлүүд ч байж болно. Мөн өдөр тутам хэрэг болох бичиг хэргийн зүйлс, хэрэгслийг ойрхон байрлуулснаар цаг ашиглалт  сайжирна.

    5. Цагийн менежментийн аргуудыг турших

    Pomodoro техник: 25 минут төвлөрөн ажиллаж, дараа нь 5 минут амрах. Ингэж 4 удаа давтагдаад 15-30 минутын урт амралт авах юм.

    Time blocking: Өдөр болон ажлын тав хоногийн цагийг тодорхой блокуудад хувааж, тус бүрд нэг төрлийн ажлыг төвлөрүүлэх арга.

    Eisenhower Matrix: Ажлуудыг чухал болон чухал биш, яаралтай болон яаралтай биш гэж ангилан, дараалал тогтоох арга. Эдгээрээс өөрт ойр хамгийн тохирохыг нь туршаад үзэхийг зөвлөж байна.

    6. Цахим ачааллыг багасгах

    Цахим ачааллыг багасгахын тулд гар утас, и-мэйл, мессеж зэргийн мэдэгдлийг тодорхой цагийн хуваарьт тохируулж шалгах нь үр дүнтэй байдаг. Жишээлбэл, өглөө, өдөр, орой гэж хуваан мэдэгдлийг хянаж, бусад үед анхаарлаа сарниулахгүй байхыг хичээх хэрэгтэй.

    Мөн ажиллах явцад анхаарал төвлөрөл алдагдахаас сэргийлэн do not disturb горимыг идэвхжүүлж, дуу чимээг багасгах нь ажлын бүтээмжийг нэмэгдүүлдэг талтай. Түүнчлэн хэрэгцээгүй, давтагдах мэдэгдлийг идэвхгүй болгож, саад болох бусад зүйлсийн чимээг багасгах нь ачааллыг үр дүнтэй зохицуулах арга юм.

    7. Сурч хөгжихөд цаг гаргах

    Шинэ ур чадвар эзэмшиж, шинэлэг ажлын арга барил сурах нь бүтээмжийг урт хугацаанд тогтвортой нэмэгдүүлэх гол хүчин зүйл болдог. Өөрийгөө байнга хөгжүүлэхийн тулд онлайн сургалт, вэбинар, ном унших зэрэг олон төрлийн аргыг ашиглан мэдлэг, чадвараа тасралтгүй дээшлүүлж байх нь зүйтэй.

    8. Багийн уур амьсгал, харилцаагаа сайжруулах

    Багийн гишүүдтэйгээ илэн далангүй харилцаж, санал бодлоо чөлөөтэй солилцох нь ажлын урсгалыг эрчимжүүлж, ойлголцлыг сайжруулдаг. Тохиромжтой үед хурал уулзалтыг тогтмол хийж, тулгарч буй хүндрэл бэрхшээлийг хамтдаа хэлэлцэн шийдвэрлэх нь хамтын ажиллагааг бэхжүүлнэ. Мөн удирдлагын зүгээс багийн уур амьсгалыг дэмжиж урамшуулал олгох, амралт чөлөөт цагаар хийх сонирхолтой зүйлс зохион байгуулах нь ажилчдын урам зориг, бүтээмжийг нэмэгдүүлэх чухал хүчин зүйл болдог билээ.

    9. Эрүүл мэнд, амралтыг эрхэмлэх

    Тогтмол хөдөлгөөн хийж, булчин сунгах дасгалуудыг гүйцэтгэснээр бие махбодь сэргээд, ажлын бүтээмж нэмэгддэг. Мөн тогтсон унтах дадлыг баримталж, хангалттай хугацаанд унтаж амрах нь эрч хүчийг сэргээж, анхаарал төвлөрлийг мөн сайжруулна. Ажлын дунд үед завсарлага авч, ялангуяа нүдний ачааллыг багасгах дасгал хийх нь сэтгэл санааг сэргээж, ядрахаас сэргийлэхэд тустай юм.

    10. Өөрийгөө урамшуулах

    Тодорхой зорилгод хүрэх бүрдээ өөрийгөө жижиг зүйлээр урамшуулж, дуртай кофегоо уух, богино хугацааны амралт авах гэх мэтээр сэтгэл зүйдээ анхаарал тавьж, өөрийгөө хайрлаарай.

    Ажил дээрх бүтээмжээ илүү сайжруулахад өөрийн ажиллах хэв маягийг ойлгож, хамгийн үр дүнтэй цагуудаа ашиглах, төлөвлөгөөтэй байх, технологийг зөв ашиглах, эрүүл мэндэдэээ анхаарах зэрэг олон хүчин зүйлийг ухаалгаар зохицуулах шаардлагатай юм. Эдгээр аргуудыг тууштай хэрэгжүүлснээр таны бүтээмжтэй ажиллах чадвар нэмэгдэж, хэсэг хугацааны дараа мэдэгдэхүйц үр дүн харагдах болно гэдэгт итгээрэй.

    Төстэй нийтлэл унших: Цагийн менежмент гэж юу вэ? 

    Энд дарж Lambda-гаар карьер замналаа тодорхойлуулаарай.

  • Карьер төлөвлөлтийн зөвлөгөө: Маркетингийн салбар

    Карьер төлөвлөлтийн зөвлөгөө: Маркетингийн салбар

    Маркетингийн салбарт ажиллах хүсэлтэй залууст зориулсан зөвлөгөө

    Маркетингийн салбар нь бүтээлч сэтгэлгээ, зах зээлийн судалгаа мэдээлэл, хэрэглэгчийн сэтгэл зүй, дата анализ болон шинэ трендүүдтэй байнга хөл нийлүүлэн алхахыг шаарддаг сонирхолтой бөгөөд эрч хүчтэй салбар юм. Хэрэв энэ салбарт хөл тавихыг хүсэж байгаа бол дараах зөвлөгөө карьераа эхлүүлэхэд тань тус болно гэдэгт итгэлтэй байна.

    Маркетингийн салбарын өргөн хүрээг ойлгох

    Маркетингийн салбар нь зөвхөн сурталчилгаа, сошиал пост бэлтгэхээс хамаагүй өргөн хүрээтэй бөгөөд брэнд менежмент, контент маркетинг, дижитал сурталчилгаа, хэрэглэгчийн судалгаа ба дата анализ, и-мэйл маркетинг болон CRM зэрэг олон чиглэлээс бүрддэг. Энэхүү салбарын олон талт онцлогийг ойлгож, өөрийн сонирхол, ур чадварт тохирсон чиглэлээ олоход анхаарах нь маркетингийн мэргэжлээр амжилттай ажиллах үндэс суурь болох юм.

    Тогтмол суралцах дадалтай болох

    Онлайн сургалтаар мэдлэгээ тэлэх нь чухал бөгөөд Grow with Google, HubSpot Academy, Coursera зэрэг олон улсын хүлээн зөвшөөрөгдсөн платформуудаас холбогдох хичээлүүдийг үзэж, сертификат авснаар том давуу тал болно.

    CV болон онлайн хуудсаа хөгжүүлэх

    Маркетингийн чиглэлээр авсан сургалтын сертификат, бүтээлч төсөл, харилцаа, асуудал шийдвэрлэх зэрэг уян хатан чадвараа оновчтойгоор CV-дээ тусгаарай. Эдгээр нь таны сурах хүсэл, хөгжилд тэмүүлж буй сэтгэлгээ, бодит чадварыг харуулж, ажил олгогчдын анхаарлыг татах хүчтэй хөзөр болдог. Тиймээс өөрийн давуу тал, хийсэн ажлуудаа тодорхой, үр дүнтэй байдлаар харуулахыг зорьж бичихэд төвлөрөөрэй.

    Энд дарж хуучин анкетаа орчин үеийн форматтай мэргэжлийн CV/Resume болгоорой. 

    Богино хугацааны төсөлд оролцох

    Туршлага нь маркетингийн салбарт амжилттай ажиллах хамгийн чухал шалгуур бөгөөд интерншип, богино хугацааны төсөл, сайн дурын үйл ажиллагаанд оролцож практик мэдлэг, ур чадвараа нэмэгдүүлэхийг зөвлөж байна.

    Өөрийн контентыг бүтээх

    Хувийн Facebook, Instagram, TikTok эсвэл блог хуудас дээр маркетингийн мэдээлэл, шинэ трендийн тухай контент бүтээж, хуваалцсанаар мэргэжлийн имиджээ бий болгох боломжтой. Энэ нь таны сонирхол, мэдлэгийг бусдад илэрхийлэх төдийгүй ажил олгогчдын анхаарлыг татаж, өөрийгөө бодитоор батлах чухал алхам болох юм.

    Харилцааны хүрээгээ тэлэх

    Маркетингийн салбар нь харилцаа сүлжээ, танилцаа холбоогоор идэвхтэй хөгждөг учраас салбарын цахим группүүдэд нэгдэх, семинар, сургалт, ивентүүдэд идэвхтэй оролцоорой. Мөн түүнчлэн мэргэжлийн хүмүүстэй холбогдох нь шинэ мэдээлэл олж авах, туршлага солилцох, ажлын боломж нэмэгдэхэд ихээхэн дэмжлэг болдог.

    Дижитал ур чадвараа хөгжүүлэх

    Мөн Canva, Google Analytics, Facebook Ads Manager мөн бусад AI хэрэгслүүдийг ухаалгаар ашиглах зэрэг чадварууд эзэмшиж, дижитал ур чадвараа байнга хөгжүүлэх шаардлагатай юм.

    Зорилтот компаниудыг жагсаах

    Ажлын заруудыг идэвхтэй судалж, өөрийн сонирхол болон ур чадварт нийцсэн зорилтот компаниудаа жагсаах нь тохиромжтой ажлын байраа олоход том түлхэц болно. Мөн тухайн ажлын байрны шаардлагуудыг нарийн судалж, ямар ур чадвар, мэдлэг шаардлагатайг ойлгосноор өөрийгөө зөв чиглэлээр бэлдэх боломжтой.

    Ярилцлагад өөрийгөө илэрхийлэх чадвар

    Ярилцлагын үед өөрийн давуу тал, хүсэл сонирхол, суралцах эрмэлзэлээ илэрхийлэх нь маш чухал. Магадгүй таны туршлага бага байж болох ч өсөх хүсэл эрмэлзэл, эерэг хандлага нь ажил олгогчдод үнэлэгдэх гол хүчин зүйл байдаг.

    Тасралтгүй суралцаж, өөрийгөө хөгжүүлэх

    Сүүлийн үеийн чиг хандлага, хэрэглэгчийн зан төлөв байнга өөрчлөгдөж байдаг тул подкаст сонсох, шинэ тренд судлах, инфлюнсерүүдийг дагаж, тасралтгүй суралцаж байх нь амжилтын түлхүүр юм. Суралцах хандлага, дижитал мэдээлэлд нээлттэй байдал бол орчин үеийн маркетерийн хамгийн том давуу тал болдог. 

    Маркетингийн салбар бол өсөлттэй, бүтээлч, хөрвөх чадвар сайтай төдийгүй маш ирээдүйтэй карьерын зам юм. Туршлагагүй байлаа ч тууштай байж, зөв бэлтгэвэл та хүссэн компанидаа ажиллах бүрэн боломжтой. Тиймээс зоригтой эхэлж, тасралтгүй суралцаарай.

    Төстэй нийтлэл унших: Та ажил хайж байна уу? Тэгвэл өөртөө итгэхээс эхлээрэй 

    Та Lambda-д талентаар бүртгүүлээрэй. Дараагийн ажлаа амжилттай олоход тань бид тусална.  

  • Ажлын ядаргаа ба сэтгэл зүйн эрүүл мэнд

    Ажлын ядаргаа ба сэтгэл зүйн эрүүл мэнд

    Сэтгэл зүйн эрүүл мэндээ хамгаалж, карьерын амжилтад хүрэх тухай

    Өрсөлдөөнтэй зах зээлд ажил хайж буй талентууд эсвэл ажлаасаа залхаж ядарсан мэргэжилтнүүдийн дунд сэтгэлээр унах тохиолдол цөөнгүй байдаг. Бид ихэвчлэн гадаад нөхцөл байдалд л анхаарч, өөрийн сэтгэл зүйн эрүүл мэндээ мартаж, анзаарахгүй өнгөрөх үе олонтаа. Гэвч хамгийн үнэт хөрөнгө бол таны бие махбодь, оюун ухаан, сэтгэл зүйн эрүүл мэнд юм.

    Яагаад сэтгэл зүйн эрүүл мэнд чухал вэ?

    Сэтгэл өвдвөл бие өвддөг гэдэгтэй адил бидний сэтгэл зүйн тогтвортой байдал нь бүтээмжтэй ажиллахад гол нөлөөлдөг хүчин зүйл билээ. Сэтгэл зүйн эрүүл мэнд гэдэг нь өдөр тутмын ачааллыг ухаалгаар даван туулах, бүтээлч байдал, урам зоригийг хадгалах чадварыг хэлнэ.

    Эрүүл сэтгэл зүй нь шийдвэр гаргах чадварыг дээшлүүлж, бүтээлч сэтгэлгээг дэмждэг. Мөн харилцааны чадварыг сайжруулж, ажлын амжилт, карьерын өсөлтөд эерэгээр нөлөөлдөг тул хувийн амьдрал болон карьерт нөлөөлөх зайлшгүй чухал асуудал юм.

    Ажил хайж буй хүмүүсийн хувьд

    Ажил хайх үе бол ихэвчлэн стресс, айдас, өөртөө эргэлзэх мэдрэмж дагуулдаг учраас энэ үед сэтгэл зүйн тэнцвэрээ хадгалах нь чухал билээ. Хэрвээ таны сэтгэл санаа тогтворгүй болсон мэт санагдаж байвал өдөр тутмын жижиг амжилтаа тэмдэглэж, өөртөө урам өгч байгаарай.

    Мөн ижил зорилготой хүмүүсийн бүлэгт нэгдэж, онлайн болон офлайн орчинд бусдаас дэмжлэг авах, сэтгэлзүйчээс зөвлөгөө хүсэх нь ийм үед тус болдог. Түүнчлэн эрүүл хооллолт, тогтмол дасгал, чанартай нойрыг хэвшүүлснээр бие, сэтгэлээ тэнцвэртэй байлгах нь мөн үр дүнтэй аргууд юм.

    Харин ажлын ядаргаанд орсон хүмүүсийн хувьд

    Ажлаас халшрах хам шинж буюу burnout нь удаан хугацаанд хуримтлагдсан стрессийн үр дүнд үүсдэг сэтгэл зүй болон бие махбодийн гүн ядаргаа бөгөөд энэ нь хүний өдөр тутмын амьдралд ноцтой нөлөө үзүүлж болзошгүй чухал сэдэв билээ.

    Хэрэв та байнга ядрах, эрч хүчгүй болох, хамт олон болон удирдлагатай харилцахад хүндрэл үүсэх, ажилдаа сэтгэл ханамжгүй болж сэтгэлээр унах, анхаарлаа төвлөрүүлж чадахгүй байх зэрэг шинж тэмдгийг мэдэрч байвал энэ нь таныг биедээ анхаар гэсэн дохио өгч буй хэрэг. Ийм үед өөртөө цаг гаргаж, амрах, сэтгэлзүйн дэмжлэг авах, эрүүл амьдралын хэв маягийг эрхэмлэх нь зайлшгүй хэрэгтэй алхам юм.

    Тэгвэл үүнээс хэрхэн сэргийлэх вэ?

    Ажлаас хамааралтай ядаргаанаас сэргийлэхийн тулд юуны түрүүнд ажил ба амралтын тэнцвэрийг хадгалах нь хамгийн чухал. Тодорхой хугацаанд амарч, шинэ зүйлийг туршиж өөрийгөө сэргээх боломж олгох, сонирхолтой, сэтгэл сэргээх үйл ажиллагаанд идэвхтэй оролцох нь сэтгэл зүйг тайвшруулж, шинэ эрч хүч өгдөг.

    Үүнээс гадна бусдын хүсэлт, шаардлагад хэт ачаалал авахгүйгээр заримдаа үгүй гэж хэлж сурах нь өөрийгөө хамгаалах, хязгаар тогтоох чухал чадвар юм. Хэрэв ингэсэн ч стрессийн түвшин өндөр байсаар байвал сэтгэл зүйн мэргэжилтэнтэй зөвлөлдөж, дэмжлэг авах нь урт хугацааны хувьд эрүүл мэнддээ хийж буй хамгийн ухаалаг хөрөнгө оруулалт болох болно.

    Сэтгэл зүйн эрүүл мэндээ хамгаалах нь карьерын амжилтын үндэс

    Нэмж хэлэхэд ажил хайх, эсвэл одоогийн ажлаа эрч хүчтэй, бүтээмжтэй хийхийн тулд сэтгэл зүйн эрүүл мэндэдээ анхаарах нь зайлшгүй чухал юм. Энэ нь таны ажлын бүтээмжийг нэмэгдүүлж, аливаа сорилтод ухаалаг, тэвчээртэй хандах, зөв шийдвэр гаргах чадварыг өгөх болно.

    Өдөр тутмын амьдралдаа сэтгэл зүйн эрүүл мэндээ дэмжих зарим аргууд

    Өдрийн тэмдэглэл хөтлөх-  Өөрийн бодол, мэдрэмжээ бичих нь сэтгэлийг тайвшруулдаг.

    Тайвшруулах дасгал хийх- Амьсгалын дасгал, бясалгал, иог зэрэг нь стрессийг бууруулна.

    Чанартай нойр авах- Сайн унтаж амрах нь тархины бүтээмжид мөн чухал нөлөөтэй.

    Өөрийгөө хайрлах- Өөрийгөө шүүмжлэхгүй, хайрлах хандлага бий болгох нь чухал.

    Сэтгэл зүйн эрүүл мэнд нь таны өөртөө анхаарах хамгийн үнэ цэнтэй хөрөнгө оруулалт юм. Ядарсан эсвэл стресстэй үедээ өөртөө анхаарал тавьж, сэтгэл зүйн эрүүл мэндээ хамгаалан дэмжих нь таны амжилттай карьер, аз жаргалтай амьдралын үндэс болно. Бие болон сэтгэлээрээ эрүүл байхын төлөө өөрийгөө хайрлаарай.

    Та ажлаас халшрах хам шинж байгаа эсэхээ Lambda Burnout AI тестээр мэдэж, өөрийн сэтгэл зүйн байдалд дүгнэлт хийгээрэй.
    Энэхүү тест нь зөвхөн өөрийнхөө ажлаас халшрах хам шинжийн түвшнийг тодорхойлох, өөрийн мэдрэмж, сэтгэл хөдлөлөө ойлгож үнэлэхэд зориулагдсан юм.
    Төстэй нийтлэл унших: Миллениал үеийнхний burnout
  • Миллениал үеийнхний burnout

    Миллениал үеийнхний burnout

    Burnout буюу ажлаас халшрах хам шинжийн тухай

    Сүүлийн жилүүдэд burnout буюу ажлаас халшрах хам шинж бүр өөрөөр сэтгэлзүйн туйлдал гэж нэрлэж буй энэ үг бидний амьдралд улам ойртож, өдөр тутмын ярианд ч байнга сонсогдох болсныг та анзаарсан биз ээ. Ажлын ачаалал, нийгмийн хүлээлт, төгс байдалд хүрэх хүсэл, цахим ертөнцийн хурдтай өөрчлөлт зэрэг нь биднийг амсхийх завгүй хөдөлгөж, эцэстээ сэтгэл болон бие махбодыг зарим талаар туйлдуулах болсон нь үнэн.

    Дэлхийн эрүүл мэндийн байгууллага (WHO) burnout-ыг “Удаан хугацаанд шийдвэрлэгдээгүй ажлын стрессээс үүдэлтэй, сэтгэлзүйн байнгын туйлдал, сэтгэл санаа болон бие махбодын ядаргаа, ажлын бүтээмж буурах байдал.” гэж тодорхойлсон байдаг.

    Энэ нь зөвхөн их ажилласнаас бус, хийж буй ажлаа утгагүй мэтээр мэдрэх, өөрийгөө дутуу үнэлэх, бусдаас үргэлж хоцорч яваа мэт санагдах, амьдралдаа эзэн биш зорилгогүй мэт мэдрэмж төрөх зэрэг гүн гүнзгий сэтгэлзүйн шалтгаануудтай холбоотой байдаг.

    Яагаад Миллениалууд хамгийн ихээр өртөж байгаа вэ?

    1981–1996 онд төрсөн хүмүүсийг миллениал үеийнхэн гэж нэрлэдэг. Тэд бол өнөөдөр дэлхийн ажиллах хүчний 60 гаруй хувийг бүрдүүлж буй хамгийн идэвхтэй, бүтээлч, дижитал сэтгэлгээтэй шинэ үеийн төлөөлөл юм. Гэхдээ энэ их эрч хүч, бүтээлч байдал нь тэднийг амжилтын эрэлд хэт гүн автуулах тохиолдол элбэг. Миллениалуудын burnout-д өртөх эрсдэлийг нэмэгдүүлдэг гол шалтгаануудыг дараах байдлаар харж болно.

    Төгс байдалд тэмүүлэх дарамт 

    Тэд өөрсдөдөө хэт өндөр шаардлага тавьдаг. Алдаа гаргах эрхгүй мэт сэтгэгдэлтэй амьдардаг нь стрессийг улам гүнзгийрүүлдэг байна.

    Эдийн засгийн дарамт

    Хөдөлмөрлөж буй ч хааяа амьдралын наад захын хэрэгцээг хангах цалин хөлс хүрэлцэхгүй байгаа нь сэтгэлзүйн дарамтыг улам нэмэгдүүлдэг. Монголд ч мөн залуус орон сууцны зээл, хэрэглээний зардал, санхүүгийн дарамтад орж, эдийн засгаас хараат амьдарч байна.

    Үргэлж онлайн байх шаардлага 

    Технологийн дэвшил нь харилцааг хөнгөвчилсөн ч, үр дүнд нь бид үргэлж ажилтай холбоотой амьдарч, ажлын болон хувийн амьдралын хил алдагдсаар байгаа билээ. Амралтгүй төдийгүй ихэнхдээ илүү цагаар ажиллах нь ажил амьдралын зөв тэнцвэрийг бүдэгрүүлэх шалтгаан болдог байна.

    Сошиал медиагийн нөлөө

    Бусдын амжилт, аялал, карьерын амжилтын зураг өдөр бүр сошиал медиа фийд дээр нүдэнд харагдсаар байдаг уу. Харин өөрийн тань амьдрал тэдгээрийн дэргэд дутуу мэт санагдаж, хангалтгүй байна гэсэн бодол давамгайлах мэдрэмжийг зарим хүмүүс авч байдаг.

    Hustle Culture буюу хөдөлмөрийг шүтэх хэт туйлшрал

    “Залуу байгаа дээрээ унтах завгүй ажилла”, “амжилтад хүрэхийн тулд бүхнээ зориулах ёстой” гэх мэт зарим тогтсон үзэл нь амьдралыг зөвхөн ажлаар хэмжих үзлийг тогтоож, хувь хүний амар амгалан, өөртөө зориулах, өөрийгөө хайрлах цаг, сэтгэлийн тайван байдлыг үгүй хийдэг.

    Холбоотой тоо мэдээлэл 

    2023 оны судалгаагаар/Gallup/ Миллениалуудын 59% нь “ажлын дарамтаас болж сэтгэлзүйн туйлдал мэдэрдэг” гэж хариулсан нь энэ үеийнхний дотоод тэнцвэр алдагдаж буйг илтгэж байна. Үүний зэрэгцээ Дэлхийн эдийн засгийн форумаас 2030 он гэхэд burnout буюу сэтгэлзүйн туйлдал нь дэлхийн хөдөлмөрийн бүтээмжид хамгийн том эрсдэл учруулах хүчин зүйлсийн нэг болно гэж анхааруулсан нь энэ асуудал зөвхөн хувь хүн төдийгүй нийгмийн тогтвортой хөгжилд ч сөргөөр нөлөөлж байгааг харуулж байна. Монгол Улсын хэмжээнд ч энэ хандлага ажиглагдаж байгаа бөгөөд 2024 онд ажилтай холбоотой сэтгэлзүйн зөвлөгөө авах хүсэлт өмнөх оноос 32%-аар өссөн нь залуу ажиллах хүчний дунд burnout нь улам бүр газар авч буйг илэрхийлж байгаа юм.

    Ажлаас халшрах хам шинжийн илрэх үе шатууд

    Шат дараалсан байдлаар энэ нь илрэх бөгөөд эхэн үедээ хүний сэтгэл зүй, бие махбод туйлдаж, нойргүйдэл, толгой өвдөлт, цухалдах байдал давамгайлж эхэлдэг. Үүний дараа хүн бусдаас өөрийгөө тусгаарлаж, хүмүүстэй харилцах хүсэл буурч, ажлаа утгагүй “зүгээр л хийх ёстой” зүйл мэтээр хүлээж авдаг. Эцэст нь өөрийгөө “би юу ч хийж чадахгүй”, “би хэрэггүй хүн” гэх мэт сөрөг бодолд автаж, ажлын бүтээмж мэдэгдэхүйц буурдаг байна. Эдгээр гурван шат бол сэтгэлзүйн туйлдлын хортой мөчлөгийн эхлэл хэсэг бөгөөд цаг алдалгүй анзаарч, арга хэмжээ авах шаардлагатай дохио юм.

    Үүнээс урьдчилан сэргийлэх зарим аргуудыг дурдвал:

    Ажлын хил хязгаарыг тогтоох

    Ажил зөвхөн ажлын цагтаа явагдах ёстой. Харин амрах үедээ и-мэйл, мессежид хариу өгөхөөс татгалзах дадал нь сэтгэл зүйн хувьд чухал хамгаалалт болдог.

    Өөртөө анхаарал тавих

    Сэтгэл зүйгээ анхаарч, бясалгал хийх, байгальд гарах, тогтмол нойртой байх, спортоор хичээллэх, амрах цагаа төлөвлөх зэрэг нь эрүүл мэндийн үндэс юм.

    Бусдаас дэмжлэг авах

    Найз нөхөд, гэр бүлтэйгээ нээлттэй харилцах хэрэгтэй. Тэдэнтэй сэтгэлээ хуваалцсанаар ганцаараа биш гэдгийг ойлгож, өөрийгөө уучлах, тайвшрах боломж бий болдог.

    Байгууллагын бодлого

    Удирдлагууд ажилтнуудынхаа сэтгэлзүйн эрүүл мэндэд анхаарах нь зөвхөн хүний нөөцийн асуудал биш, компанийн тогтвортой хөгжлийн үндэс гэдгийг ойлгох хэрэгтэй.

    Мэргэжлийн тусламж авахаас бүү санаа зов

    Энэ талаар мэргэшсэн сэтгэл зүйчид хандах нь эмчилгээний эхлэл бөгөөд тухайн байдлаас хурдан хугацаанд гарах зоригтой шийдэл юм.

    Миллениалууд бол шинэ сэтгэлгээ, дижитал хувьсгал, нийгмийн өөрчлөлтийн түлхүүр болсон үе. Гэвч энэ амжилт, өөрчлөлтийн ард burnout нь хурдацтай тархаж байна. Өөрийгөө алдахгүй байхын тулд амжилтын төлөө тэмцэхдээ өөрийгөө мартаж болохгүйг үргэлж санаарай. 

    Амжилтаас өмнө эрүүл мэнд, өөрийн дотоод амар амгалан хамгийн чухал байдаг. Өөрөө л өөрийнхөө хамгийн үнэ цэнтэй хөрөнгө гэдгийг ухаарах нь чухал юм. Өөрийгөө хамгаалах, дэмжих, хайрлах үүрэг бидэнд л бий. Төгс байх албагүй харин зүгээр л сайн байх нь заримдаа хангалттай юм шүү.

    Илүү олон зөвлөгөө, карьер хөгжүүлэлтийн мэдээллийг LAMBDA платформоос аваарай 

    Эх сурвалж: World Health Organization, Gallup – State of the Global Workplace Report 2023, Deloitte – Millennials and Gen Z Survey 2023, World Economic Forum, Монголын Сэтгэцийн Эрүүл Мэндийн Төв, UNFPA Mongolia – Залуучуудын амьдралын чанар судалгаа (2022)

  • Ажил хайхдаа анхаарах 10 чухал зүйл

    Ажил хайхдаа анхаарах 10 чухал зүйл

    Ажил хайна гэдэг бол зүгээр нэг зарын дагуу анкет бөглөөд, хариу хүлээж суухаар хязгаарлагддаггүй үйл явц бөгөөд энэ нь амьдралын дараагийн алхмаа төлөвлөх, мэргэжлийн өсөлт хөгжил, хувийн зорилгоо биелүүлэх чухал үе шат юм. 

    Хэсэг зуур ажил эрхлэхгүй байх нь хувь хүнийг бухимдалтай, тодорхойгүй байдалд хүргэж болох ч үүнийг шинэ боломжуудыг эрэлхийлж, өөрийгөө илүү сайн таньж мэдэх сайхан боломж хэмээн харах нь зөв юм. Өөрт хамгийн сайн тохирох ажлаа олохын тулд бид анкет бөглөхөөс илүү зүйлийг хийх шаардлагатай болдог. Үүнд өөрийгөө бэлтгэх, зорилгоо тодорхойлох, зах зээлээ ойлгох, сэтгэлзүйгээ ч давхар бэлдэх зэрэг хамаарна.

    Ажил хайж буй тухайн хугацаа танд өөрийгөө нээх, юунд үнэхээр дуртай вэ гэдгээ ойлгох, мөн ирээдүйн замналаа илүү ухаалгаар төлөвлөх ховор боломжийг өгнө гэдэгт бүү эргэлзээрэй. Хэрвээ та системтэй, зорилготойгоор ажил хайж чадвал зөвхөн ажилтай болох бус харин сэтгэл ханамжтай, тогтвортой, өөрийн хөгжлийг дэмжих орчныг бий болгох бодит боломжийг олж авах юм.

    Тэгвэл юунд анхаарч, хэрхэн энэ үйл явцыг илүү үр дүнтэй, ухаалгаар давж гарах вэ? Энэхүү нийтлэлээр бид ажил хайж буй талентуудын амжилттай ажлаа олоход туслах заавал анхаарах ёстой 10 чухал зүйлийг танилцуулж байна.

    1. Өөрийгөө зөв тодорхойлох

    Ажил хайх эхний алхам бол өөрийгөө сайн таньж мэдэх юм. Та ямар чиглэлд, ямар төрлийн ажилд хамгийн тохирох вэ? Таны мэдлэг, туршлага, ур чадвар юунд илүү тохирох вэ? Энэ бүхнийг тодорхой болгоогүй байхад зөв ажилд орох магадлал тэр хэмжээгээр багасдаг. Өөрийгөө тодорхойлох нь таны ажил олох зорилгыг илүү нарийвчлан чиглүүлж өгнө.

    2. Мэргэжлийн CV бэлдэх

    CV бол таныг ажил олгогчид танилцуулах нэрийн хуудас юм. Хэт урт, эмх замбараагүй, алдаатай CV таныг ажилд авахаас татгалзах шалтгаануудын нэг болдог. CV-г нэгээс 2 хуудсанд багтаан, боловсрол, ажлын туршлага, гол амжилт, ур чадвараа тодорхой илэрхийлсэн байх хэрэгтэй. Мөн CV-гээ тухайн ажлын байр бүрийн шаардлагад нийцүүлэн тохируулж бичих нь зүйтэй.

    3. Cover Letter буюу хавсралт захидал бэлдэх

    Ихэнх ажил хайж буй хүмүүс cover letter бичдэггүй. Гэтэл энэ нь таны сонирхсон байгууллагад ажиллах хүсэл, бэлтгэлтэй байдал, өөрийгөө илэрхийлэх чадварыг харуулах хамгийн чухал бичиг болох юм. Үүнийг бичихдээ тухайн компанийн талаар судалсан гэдгээ илтгэж, яагаад уг ажилд тохирох хүн бэ гэдгээ товч бөгөөд үнэмшилтэй илэрхийлээрэй.

    4. Ажил олгогч байгууллагын талаар судалгаа хийх

    Сонирхсон ажлын байр, компанийнхаа талаар урьдчилан судалж, тэдний эрхэм зорилго, үнэт зүйл, соёлын тухай мэдэх нь таны ярианд итгэл нэмнэ. Мөн өөрийнхөө үнэт зүйлтэй хэр нийцэж байгааг ойлгох нь тухайн ажлын байранд ирээдүйд сэтгэл ханамжтай ажиллах үндэс болдог.

    5. Платформуудыг үр дүнтэй ашиглах

    Өнөө үед ажил хайх хамгийн хялбар, үр дүнтэй арга бол онлайн платформуудад бүртгүүлж, профайлаа бүрэн бөглөж, танилцуулга мэдээллээ байнга шинэчилж байх нь чухал. Мөн та зарим linkedin зэрэг платформд өөрийгөө сурталчлах агуулга, пост бичиж, харилцааны сүлжээгээ тэлж ч болно.

    Та Lambda платформд талентаар бүртгүүлээрэй. Тохирсон ажлаа амжилттай олоход тань бид тусална.  

    6. Хүрээлэл үүсгэх буюу Networking

    Зарим ажлын байр танилын хүрээгээр олддог. Найз нөхөд, өмнө хамт ажиллаж байсан хүмүүс, сургуулийн танилуудтайгаа байнга холбоотой байж, ажил хайж буйгаа мэдэгдэх нь нээлттэй үүд хаалгыг бий болгох юм.

    7. Ажлын ярилцлагад бэлтгэх

    Ажлын ярилцлага нь өөрийгөө хэрхэн илэрхийлж чадаж байгааг баталж харуулах үе юм. Түгээмэл асуултуудад хариулах бэлтгэл хийх (“Өөрийгөө танилцуулаач?”, “Таны давуу, сул тал юу вэ?”) нь амжилттай ярилцлага өгөх үндэс юм. Биеийн хэлэмж, хувцаслалт, цаг баримтлал зэргийг ч мөн мартаж болохгүй.

    8. Цагийн менежмент, тууштай байдал

    Ажил хайх үйл явц нь заримдаа хурдан үр дүн өгөхгүй тохиолдол бий. Гэхдээ та өдөрт тодорхой цагийг ажил хайхад зарцуулж, зорилгоо бичин, хяналт тавьж чадвал амжилтад хүрэхэд илүү ойртох болно. Тууштай байх нь хамгийн чухал билээ.

    9. Өрсөлдөх чадвараа нэмэгдүүлэх

    Технологийн эрин үед өөрийгөө тасралтгүй хөгжүүлж байх шаардлагатай. Та олон улсын онлайн сургалтын платформуудаар дамжуулан шинэ ур чадвар зайнаас эзэмшиж, сертификат авснаар өөрийгөө өрсөлдөгчдөөс ялгаруулж чадна. Хэрэв ажилд ороогүй ч суралцсаар байгаа бол энэ нь ажил олгогчдод эерэг сэтгэгдэл төрүүлдэг.

    10. Сэтгэлзүйгээ бэлдэх

    Ажилд орж чадахгүй удах тохиолдолд сэтгэлээр унах нь элбэг. Гэхдээ татгалзсан хариу бүр таныг илүү зөв газар хүргэх шат болдгийг санах хэрэгтэй юм. Амралт авч, сэтгэлзүйн дархлаагаа дэмжих нь таны дараагийн алхамд илүү амжилт авчрах болно.

    Ажил хайна гэдэг нь өөрийгөө хөгжүүлэх, илүү зөв сонголт хийх боломж билээ. Та зорилгоо тодорхойлж, өөрт тохирсон ажлаа системтэйгээр хайж, дээрх алхмуудыг ухаалгаар хэрэгжүүлбэл зөвхөн ажилтай болоод зогсохгүй, урт хугацааны сэтгэл ханамжтай карьерт хөл тавих болно.

    💡 Энд дарж хуучин анкетаа орчин үеийн форматтай мэргэжлийн CV/Resume болгоорой. 

    Төстэй нийтлэл унших: Та ажил хайж байна уу? Тэгвэл өөртөө итгэхээс эхлээрэй 

  • Өрсөлдөөнд ялгарах CV хэрхэн бичих вэ?

    Өрсөлдөөнд ялгарах CV хэрхэн бичих вэ?

    Та ойрын үед ажил идэвхтэй хайж байгаа юу? Эсвэл өөрийгөө илүү сорьж, илүү боломж руу алхмаар санагдаж байна уу? Хэрвээ тийм бол таныг илэрхийлэх мэргэжлийн танилцуулга нь дараагийн том боломжийн үүдийг нээж өгч чадах хамгийн чухал зүйл гэдийг хэлье.

    CV таныг хэн бэ гэдгийг илэрхийлнэ

    Ажил хайж буй талент таны тухайн байгууллагын хүний нөөцийн ажилтантай уулзахаас өмнө та хэн бэ, юу хийж чаддаг вэ, юунд дуртай вэ, ямар үнэ цэн бүтээдэг вэ гэдгийг харуулах буюу өөрийгөө урьдчилан танилцуулах боломж бол CV/Resume юм.

    CV бол таны брэнд

    Цөөнгүй хүмүүс CV-гээ амжаад гялс нэг юм хийчихье гэдэг байдлаар бичдэг. Интернэтээс загвар татаж аваад, өмнөх ажлуудаа хуулж тавьдаг. Гэхдээ ингэх нь өөрийнхөө тухай чухал мэдээллийг сонирхолгүй, нэг өнгө хэмнэлээр, бүтээлч бусаар илэрхийлж байгаа хэрэг юм.

    CV бол яг үнэндээ таны карьерын маркетингийн хэрэгсэл билээ. Та өөрийгөө хөдөлмөрийн зах зээл дээр хэрхэн сурталчилж байгаа, өөрөөр хэлбэл бусдад хэр чадвөртай, онцлогтой, мэргэшсэн хүн гэдгээ илэрхийлж буй арга юм. Иймд бид хамтдаа үүнийг илүү амьд, илүү үнэмшилтэй, илүү өөрийгөө харуулсан байдлаар шинэчилж чадна.

    Карьерын түүх

    Таны CV зөвхөн ажил, он сар, байгууллагын нэрсийн жагсаалтаар хязгаарлагдахгүй харин таны амжилтын замналын түүх бичигдсэн байх хэрэгтэй. Та өөрийгөө мэргэжлийн зүгээс “би чаддаг, бүтээдэг, хөгжиж ахисан” гэдгээ гүн гүнзгий ойлгомжтойгоор харуулах боломжоо бүрэн ашиглаарай. Харин тэрхүү түүхийг сонирхолтой, цэгцтэй, хүний анхаарал татахуйц хэлбэрт оруулах нь танаас ихээхэн шалтгаалах юм. Тэгэхийн тулд судалгаа мэдээлэл, цаг зав, хичээл зүтгэл бүхнээ зориулах шаардлагатай.

    CV-гээ сайжруулж, сайн танилцуулгатай болно гэдэг зүгээр нэг бичиг цаасны ажил биш, харин өөрийгөө дахин харж, үнэлэх, тухайн салбарынхаа чадвартай хүн гэж өөртөө итгэлтэйгээр хэлэх, улмаар илүү боломж руу хөтлөх хаалгыг нээх эхний чухал алхам юм. Ингэхийн тулд танд дараах зөвлөгөөг өгье.

    Өөрийгөө товч бөгөөд тодорхой танилцуулаарай

    CV-ний хамгийн эхэнд хэн бэ гэдгээ хялбар ойлгогдохоор бичээрэй. Энэ хэсэг таныг илтгэх буюу мэргэжил, туршлага, давуу талуудын товч тодорхойлолт байх юм. Мөн дээр нь сэтгэл хөдлөл, хүсэл эрмэлзэлээ шингээвэл ажил олгогч танд итгэх, эерэг сэтгэгдэл төрүүлэх алхам болох болно.

    Зөвхөн хэрэгтэй бас хамааралтай мэдээлэл

    CV дээрээ бүх зүйлээ бичих шаардлагагүй. Харин тухайн ажлын байранд тохирсон хамгийн чухал мэдээллийг онцлоорой. Тухайлбал: Олон нийтийн арга хэмжээ зохион байгуулсан гэж бичихийн оронд “3 удаа 200+ хүнтэй эвент зохион байгуулж, арга хэмжээнд оролцогчдийн сэтгэл ханамж нэмэгдүүлэхийн тулд идэвхжүүлэлт хийсэн” гэх мэтээр бичвэл илүү анхаарал татна.

    Туршлагаа ажлын жагсаалтаас илүү үр дүнгээр илэрхийлэх

    Ажлын туршлагаа зүгээр л юу хийснээ жагсааж бичих биш, ямар үр дүн гаргасан, ямар нөлөө үзүүлсэн гэдгийг мөн нэмж оруулаарай. Жишээ нь “Компанийн Facebook хуудсыг 6 сарын хугацаанд 10,000 дагагчтай болгож, органик хандалтыг 3 дахин өсгөсөн. Энэ нь таныг зорилготой, санаачилгатай, үнэ цэн бүтээдэг хүн гэдгээ харуулж байгаа нэг илэрхийлэл болно.

    Ойлгомжтой бичих

    Хэтэрхий албаны хэллэгээр дүүрэн CV-г унших хэцүү байдаг. Харин энгийн үгээр, ойлгомжтой бичсэн бол хэн ч уншихад амар байх бөгөөд өөрийгөө хэрхэн хамгийн тодорхой илэрхийлэх яриа мэт бичвэрээр харуулахыг эрмэлзээрэй.

    CV-гээ lambda -гын AI-р шинэчлээрэй.  

    Загварыг цэгцтэй, нүдэнд эвтэйхэн болгох

    Ажил олгогч 10 секунд л таны CV-г эхний удаа хардаг гээд төсөөлөх хэрэгтэй. Тэгэхээр хараад л ойлгогдохуйц, уншихад хялбар бүтэцтэй байвал, мэдрэмжтэй загвартай байхыг сонгоорой.

    Чадвараа хэмжигдэхүйц илэрхийлэх

    “Би багаар ажилладаг, хүмүүстэй сайн харилцдаг” гэх нь мэдээж хэрэгтэй ч яг юу хийж, ямар түвшинд гэдгээ тодорхой болгоорой. Мөн хэлний мэдлэгээ бичихдээ, Англи хэл – Upper Intermediate (B2 – Бичгийн болон ярианы чадвартай) гэх мэтээр тодорхой бичих хэрэгтэй юм.

    Reference буюу танилцуулах хүнийг бодож сонго

    Ажил олгогч таны тухай бусдаас сонсохыг хүсдэг. Тиймээс өмнөх удирдлага, хамтран ажиллагч зэрэг итгэл даах хүний мэдээллийг анхааралтай сонгож бичээрэй.

    Зурагаа сонгохдоо анхааралтай сонгох

    Хэрвээ та зураг оруулах бол цэвэрхэн, албан ёсны зураг байгаарай. Селфи, гэрэл зурагны цаадах арын фон бүдэг, анхаарал сарниулсан байвал сэтгэгдлийг бууруулдаг.

    Англи хувилбараар танилцуулгаа бэлдэх

    Өнөө үед олон байгууллага англи хэл дээр CV авах шаардлага тавьдаг. Тиймээс нэг удаа чанартай орчуулсан хувилбараа хадгалаад аваарай. Ажил олгогчийн итгэлийг англи дээр ч авч чаддаг бол танд боломж үргэлж нээлттэй байх болно.

    CV-гээ тогтмол шинэчлэх хэрэгтэй

    CV нь нэг удаа бичээд мартдаг биш таны хөгжлийн түүх байх ёстой учраас жил бүр, бүр улирал бүр шинэ зүйл нэмэгдэж байх нь зөв юм.

    Сонгон шалгаруулалтын ажилтан анх таны CV-г нээж харах тэр мөчид та ирээдүйн багийн боломжит гишүүн гэж харагдах ёстой. CV бол таныг талаарх анхны сэтгэгдлийг эхлүүлдэг, харин ярилцлага бол таныг баталдаг үе шат гэдгийг санаарай. 

    Lambda-гын AI таны CV-г хөгжилтэйгээр шүүмжлэн, хошигнол хосолсон зөвлөгөөг өгөх болно

    Та Lambda-д талентаар бүртгүүлээрэй. Дараагийн ажлаа амжилттай олоход тань бид тусална.  

  • Туршлага багатай хүмүүст тохирох ажлын байр

    Туршлага багатай хүмүүст тохирох ажлын байр

    Өнөөдөр ажил хайж буй залуус, ялангуяа их сургуулиа төгсөөд удаагүй байгаа шинэ төгсөгчид, гадаадад амьдарч байгаад ирсэн хүмүүс, хэсэг хугацаанд албан ажлаас завсарлага авсан залуус, эсвэл хүүхдээ асраад карьер төлөвлөлтөө түр хойшлуулсан эмэгтэйчүүдийн хувьд хамгийн түгээмэл тулгардаг асуудал бол ажлын туршлага дутмаг байх явдал байдаг. Ажил олгогчид туршлагатай хүн хайж байхад өөрийгөө хангалттай биш мэт мэдрэх буюу “Би яг юу хийж чадах вэ?”, “Надад боломж байгаа юу?” гэсэн эргэлзээ, түгшүүр олон хүний сэтгэл дотор төрөх нь бий.

    Гэвч энэ бүхэн таныг зогсоох ёсгүй бөгөөд туршлагагүй байлаа гээд ажилтай болж чадахгүй гэсэн үг огтхон ч биш юм. Харин ч эсрэгээрээ өөрийгөө хөгжүүлж, суралцаж, ажлын ертөнцөд хөл тавих, боломжоо нээх хэрэгтэй билээ. Хамгийн гол нь өөрт тохирсон түвшний ажлын байрыг олж харах, түүнийгээ зоригтойгоор сонгож, өөрийгөө сорих урам зоригтой байх нь чухал.

    Ажил гэдэг бол зөвхөн туршлага дээр тулгуурладаг зүйл биш. Тэр ч утгаараа хувь хүний хандлага, хичээл зүтгэл, сурах хүсэл зэрэг нь ажил олгогчдын хамгийн үнэлдэг чанаруудын нэг болсоор байна. Тиймээс өөртөө итгэж, ажлын байраа олоход чинь туслах боломжуудыг эрэлхийлэх нь таны карьерын зөв зам байж чадна. Туршлага тэр бүр шаарддаггүй зарим боломжит ажлын байруудыг та бүхэнд танилцуулъя:

    Туршлага шаарддаггүй ажлын байрнууд

    1. Худалдааны зөвлөх (касс, дэлгүүрийн ажилтан гэх мэт)

    Энэ төрлийн ажлууд нь хүнтэй харьцах чадвар, хариуцлага, түргэн сэтгэх чадвар шаардах бөгөөд өмнөх ажлын туршлага заавал шаарддаггүй. Ихэнх дэлгүүр, супермаркет, барааны дэлгүүрүүд анхан шатны сургалт чиглүүлэг өгдөг тул оюутан, шинэ төгсөгчдөд ч мөн тохиромжтой. Мөн цаг нь уян хатан, ээлжээр ч ажиллах боломжууд зарим газар олгодог.

    2. Оффисын туслах ажилтан

    Зарим байгууллагууд баримт бүрдүүлэх, бичиг цаасны ажил хийх туслах ажилтнуудыг ажилд авахдаа ажлын туршлага шаардахгүй, зөвхөн бага зэргийн компьютерийн мэдлэгтэй, хурдан шуурхай байхыг хүсдэг. Энэ бол оффисын орчинд дадлагажих маш сайн боломж юм.

    3. Харилцагчийн үйлчилгээний ажилтан (call center)

    Утас, мессеж, и-мэйлээр хэрэглэгчдэд мэдээлэл өгөх, гомдол хүлээн авах зэрэг ажлууд туршлагагүй хүмүүст зориулсан анхан шатны түвшний ажилд ордог. Сайн сонсох чадвар, эелдэг харилцаа, сэргэлэн бөгөөд идэвхтэй байх зэрэг нь энэ төрлийн ажлын гол шалгуур билээ.

    4. Жолооч, хүргэлтийн ажилтан

    Хэрвээ та жолооны үнэмлэхтэй бол хүргэлтийн үйлчилгээ, таксины жолооч, бараа тээвэрлэгч зэрэг ажлууд руу орж болно. Туршлагагүй байсан ч жолооны ур чадварт тулгуурлан орлоготой болж чадна. Үүнд замаа сайн мэддэг, харилцааны чадвартай, машин техникийн суурь мэдлэгтэй байх нь бүтээмжийг илүү нэмэгдүүлэх юм.

    5. Үйлчлэгч, цэвэрлэгээний ажилтан

    Энэ бол тогтмол орлоготой, тогтвортой ажлуудын нэг. Гэр цэвэрлэх, оффис цэвэрлэх, зочид буудал, үйлчилгээний байгууллагад үйлчлэгчээр ажиллахад ихэнх тохиолдолд ажлын туршлага шаардахгүй.

    6. Хэвлэл мэдээлэл, сошиал медиа туслах

    Тренд мэдэрдэг, контент бүтээх дуртай хүмүүс Facebook, TikTok, Instagram хуудсуудад контент бэлтгэх, сториг зохиох зэрэг ажлыг албан байгууллагууд танд фриланс хэлбэрээр санал болгож болно. Туршлагагүй байсан ч сонирхолд тулгуурлах учир өөрийн сошиал хуудсаараа дамжуулан ажлаа харуулах боломжтой.

    7. Бариста, кофе шоп-н ажилтан

    Богино хугацааны сургалтад хамрагдаж, заавар чиглүүлэг авахад энэ ажлыг хэрвээ та сонирхож байвал заавал удаан хугацааны туршлагыг танаас шаардахгүй. Ингэхдээ харин харилцааны чадвартай, хариуцлагатай байх нь чухал юм.

    8. Цэцэг, бэлэг дурсгалын дэлгүүрт ажиллах

    Мөн энэ төрлийн ажил нь сонирхолтой бөгөөд та хэрэглэгчдэдээ өдөр тутам аз жаргалыг бэлэглэж, баярын дурсамжийг нь хуваалцах гэгээлэг ажил юм. Та төрөл бүрийн бэлэг боох, савлах, цэцгийн баглаа бэлдэхэд тодорхой хэмжээний заавар зөвлөгөөг бусдаас авч болно эсвэл интернэт орчноос дүрс бичлэг үзээд дуурайгаад сурах ч боломжтой.

    CV-гээ lambda -гын AI-р шинэчилж, талентаар бүртгүүлээрэй. Дараагийн ажлаа амжилттай олоход тань бид тусална. 

    Ажлын ярилцлагад бэлдэхэд анхаарах зүйлс

    • CV/анкет сайн бичих: Хэдийгээр туршлагагүй ч хичээл сурлагын амжилт, сайн дурын ажил, хувь хүний зөөлөн ур чадвар болон хандлагаа тодорхой бичих.

    • Ур чадвараа онцлох: Компьютер дээр ажиллах чадвар, хэлний мэдлэг, зохион байгуулах чадвар зэрэг нь давуу тал болно.

    • Идэвхтэй, суралцах хүсэлтэй гэдгээ харуулах: Туршлагаас илүүтэйгээр ажилд эзэмших эрмэлзэл чухал.

    Ажилд орохын тулд заавал олон жилийн туршлагатай байх шаардлагагүй. Хамгийн чухал нь зорилготой, тууштай, суралцах хүсэлтэй байх явдал юм. Монголын хөдөлмөрийн зах зээлд туршлагагүй болон туршлага багатай хүмүүст тохирох олон боломжууд нээлттэй байдаг тул өөрт тохирсон ажлыг хайж, эхний алхмаа зоригтой хийгээрэй.

    Илүү олон ажилд орох зөвлөгөө, ярилцлагад бэлтгэх арга, карьер хөгжүүлэлтийн мэдээллийг манай LAMBDA платформоос аваарай.  

    Холбоотой нийтлэл унших: Төгсөгчдөд зориулсан анхны ажлаа олох зөвлөгөө

  • Карьер төлөвлөлт: Ментортой байхын давуу тал

    Карьер төлөвлөлт: Ментортой байхын давуу тал

    Мэргэжлийн замналын эхэнд, ялангуяа их дээд сургууль төгсөөд удаагүй залуусын хувьд хөдөлмөрийн зах зээлд хөл тавихад мэдээлэл дутмаг байх, туршлагагүйгээсээ болж эргэлзэх нь түгээмэл үзэгдэл юм. Шинэ орчинд дасан зохицох, байгууллагын дүрэм журам, компанийн соёл, ажил олгогчийн хүлээлт гээд олон зүйл тодорхой бус санагдаж, өөртөө итгэх итгэлийг үгүй хийх үе ч гарна. Яг л ийм үед замыг тань зааж, туршлагаасаа хуваалцан, зөв сонголт хийж, итгэлтэй урагшлахад тань менторын туслалцаа хэрэг болох юм. Ментортой байх нь тодорхой чиглэлтэйгээр өсөж хөгжих боломжийг талентуудад нээдэг. 

    Ментор гэж тухайн салбартаа туршлага хуримтлуулсан, бусдад мэдлэг, чадвараа хуваалцан, хөгжиж дэвшихэд нь тусалдаг чиглүүлэгч хүнийг хэлнэ. Тэр таны найз байж болохгүй ч, бодит зөвлөгөө өгдөг, алсын харааг тань тодорхойлж өгдөг карьерын хамтрагч байж чадна. Туршлагатай ментор таныг алдаа гаргахаас сэргийлж, зөв замаар хөгжихөд чиглүүлдэг. Мөн сэтгэлзүйн дэмжлэг үзүүлж, өөртөө итгэх итгэлийг нэмэгдүүлэхийн зэрэгцээ салбарын үнэ цэнтэй холбоо сүлжээ, шинэ боломжууд руу таныг хүргэх ач холбогдолтой юм.

    Mentorship гэж юу вэ, яагаад чухал вэ? 

    Mentorship буюу менторын харилцаа нь тухайн салбартаа туршлага, мэдлэгтэй мэргэжилтэн өөрөөс нь туршлага багатай хүнд урт хугацаанд чиглэл өгч, хөгжихөд нь дэмжлэг үзүүлдэг мэргэжлийн харилцаа юм. Энэхүү харилцаа нь зөвхөн ажил мэргэжлийн зөвлөгөөгөөр хязгаарлагдахгүй, хувь хүний хөгжилд ч чухал нөлөө үзүүлдэг олон талт давуу талтай. Менторын дэмжлэгээр карьерын замыг илүү хурдан, ухаалгаар туулж, бодит туршлагад үндэслэсэн үнэт зөвлөгөөг авах боломжтой бөгөөд энэ нь мэргэжлийн сүлжээг тэлж, шинэ боломжуудыг нээхэд ч түлхэц болдог.

    Мөн менторын зүгээс өгсөн урам зориг, итгэл нь өөртөө итгэх итгэлийг нэмэгдүүлж, асуудалд бүтээлч, ухаалаг хандах чадварыг хөгжүүлдэг. Нэг удаагийн уулзалт бус, харилцан итгэлцэл, хүндлэл дээр суурилсан тасралтгүй хөгжлийн энэхүү харилцаа нь шинэ төгсөгчдөд төдийгүй карьерийн дараагийн шат руу ахихыг хүссэн хэн бүхэнд амжилт руу хөтөлсөн үнэ цэнтэй замналыг бүтээхэд нэн чухал үүрэгтэй байдаг билээ.

    Ментортой байх 5 гол давуу тал

    1. Бодит туршлага дээр суурилсан зөвлөгөө авна

    Менторын зөвлөгөө номонд бичсэн ерөнхий зүйлсээс илүү амьдрал дээр туршиж үзсэн, асуудлыг хэрхэн шийдсэн бодит кейс дээр тулгуурладаг. Энэ нь танд богино хугацаанд суралцах, алдааг багасгах боломж олгоно.

    2. Хувь хүний чадваруудыг хөгжүүлнэ

    Та өөрийн харилцааны ур чадвар, шийдвэр гаргах, ажлын байрны соёлд дасан зохицох зэрэг “soft skill”-үүдийг сайжруулахад ментор тусална. Заримдаа та өөрийнхөө сул болон давуу талыг таньж ч чадахгүй байхад, ментор үүнийг тань оношилж, зөв чиглүүлж чадна.

    3. Мэргэжлийн сүлжээ буюу network-д холбогдох

    Менторууд олон байгууллага, салбарын мэргэжилтнүүдтэй холбоотой байдаг тул тэд танд танилцуулга хийж, шинэ боломжуудыг нээж өгөх гарц болж чадна.

    4. Өөртөө итгэх итгэлийг нэмэгдүүлнэ

    Ажил хайж явах үед татгалзсан хариу, сорилт бэрхшээл тулгардаг. Менторын урам өгсөн үгс, бодит жишээ, зөвлөгөө таны итгэлийг сэргээж, зоригжуулж чаддаг.

    5. Карьерын алсыг харж төлөвлөхөд тусална

    Ментортой харилцах нь танд зөвхөн өнөөдрийн ажлыг олоход бус, ирээдүйд хэн болж хөгжихийг тань ойлгуулахад чухал үүрэгтэй. Тэд дараагийн алхам юу байхыг асууж, таныг бодох, төлөвлөх, өсөх сэдлийг төрүүлнэ.

    Хэрхэн ментороо олох вэ?

    Та их сургууль төгсөөд ажил, карьерынхаа гарааг эхлүүлж байна уу? Эсвэл дараагийн сонголтоо хийхээр тохиромжтой ажлаа хайж байна уу? Тэгвэл зөв хандлага, зөв хүнээс суралцах нь таны хамгийн чухал алхмуудын нэг юм. Туршлагатай ментор танд зөв чиглэл зааж, алдаа гаргахгүйгээр урагшлахад тусалж, таны хувийн хөгжилд үнэтэй дэмжлэг болдог. Иймээс өөрийн сонирхож буй салбарынхандаа суралцаж, зөвлөгөө авч чадах хүнээ олох нь таны ирээдүйн амжилтад чухал нөлөө үзүүлнэ.

    Ментороо олохын тулд салбарын арга хэмжээ, мэргэжлийн уулзалтууд, networking event-үүдэд оролцож эхлээрэй. Сошиал платформыг ашиглан тухайн салбарын мэргэжилтнүүдтэй холбогдож, хүндэтгэлтэйгээр зөвлөгөө хүсэх боломж ч бий. Мөн багш, найз нөхөд, хамт олон, гэр бүлийн танилуудаасаа зөвлөх авч болох хүнийг хайж, танилын хүрээгээ өргөтгөх хэрэгтэй. Үүнээс гадна байгууллагууд болон ТББ-уудын санал болгодог менторшип хөтөлбөрүүдэд бүртгүүлж, албан ёсны сувгаар ментортой болох ч бас нэг оновчтой арга юм.

    Дүгнэлт

    Өнөөдөр хөдөлмөрийн зах зээл хурдтай, улам л өрсөлдөөнтэй болж байна. Таныг бусдаас ялгаруулах зүйл бол зөв сонголт, мэргэжлийн зөвлөгөө, тогтвортой хөгжих сэтгэлгээ зэрэг юм. Харин үүнийг зөв чиглүүлж өгөх хүн бол таны ментор байх болно.

    Хэрэв та карьераа өөртөө итгэлтэйгээр эхлүүлэхийг хүсэж байгаа бол, ганцаараа биш ментортой хамт эхлээрэй.

    CV-гээ lambda -гын AI-р шинэчилж, талентаар бүртгүүлээрэй. Дараагийн ажлаа амжилттай олоход тань бид тусална. 

    Илүү олон ажилд орох зөвлөгөө, ярилцлагад бэлтгэх арга, карьер хөгжүүлэлтийн мэдээллийг манай LAMBDA платформоос аваарай.  

    Холбоотой нийтлэл унших: Төгсөгчдөд зориулсан анхны ажлаа олох зөвлөгөө

  • Одоогоос 10 жилийн дараа та хэн байх вэ?

    Одоогоос 10 жилийн дараа та хэн байх вэ?

    Хөдөлмөрийн зах зээлд амжилттай байх ирээдүйн төлөвлөгөөгөө хамтдаа гаргацгаая

    Яагаад ирээдүйгээ өнөөдрөөс төлөвлөх хэрэгтэй вэ?

    Хөдөлмөрийн зах зээл урьд өмнөхөөсөө илүү хурдтай өөрчлөгдөж байна. Хиймэл оюун ухаан, автоматжуулалт, дижитал шилжилт зэрэг технологиуд нь уламжлалт ажлын байруудыг шинэчлэн шинэ чадвар, шинэ мэргэжлийг шаарддаг болсон. Таны хувьд 10 жилийн дараа ямар байх вэ? Энэ бол зүгээр нэг асуулт биш. Харин амьдралын тань стратегийн төлөвлөгөө байх ёстой юм.

    Ирээдүйн хөдөлмөрийн зах зээл ямар байх вэ?

    Дэлхийн Эдийн Засгийн Форумын (WEF) судалгаанд дурдсанаар 2035 он гэхэд дэлхийн хөдөлмөрийн зах зээл дээр 1 тэрбум гаруй ажил үүрэг дахин тодорхойлогдоно гэж үзэж байна. Энэ нь зөвхөн олон улсад бус, Монголын хөдөлмөрийн зах зээлд ч мэдэгдэхүйц нөлөө үзүүлэх юм.

    Өмнө нь тогтвортой, удаан хугацаанд хэрэгцээтэй гэж тооцогддог байсан уламжлалт мэргэжлүүд аажмаар хумигдаж, оронд нь дижитал, бүтээлч чиглэлийн шинэ ажлын байрууд эрэлттэй болж байна. Цаашлаад ганцхан мэргэжил эзэмших хангалтгүй болж, нэг хүнээс олон ур чадвар, салбар дамнасан мэдлэг шаарддаг болж байгаа нь хөдөлмөрийн зах зээлд шинэ сорилт, шинэ боломжийг авчирч байгаа юм.

     Ирээдүйд эрэлттэй байх мэргэжлүүд

    Салбар Ирээдүйн мэргэжил Гол ур чадвар
    Мэдээллийн технологи Программист, Дата шинжээч, AI инженер Код бичих, логик сэтгэлгээ, өгөгдөл боловсруулах
    Финтек ба Санхүү Блокчэйн мэргэжилтэн, Криптовалют шинжээч Дижитал санхүү, өгөгдлийн анализ
    Маркетинг ба медиа Дижитал маркетингч, Контент бүтээгч Бүтээлч сэтгэлгээ, сошиал мэдлэг, өгөгдөл ашиглалт
    Эрүүл мэнд Телемедицин, Дижитал эрүүл мэнд, Сэтгэл зүйч Технологи+сэтгэл зүй, эмнэлгийн программын хэрэглээ
    Боловсрол Онлайн багш, EdTech хөгжүүлэгч Сургалтын дизайн, интерактив орчин бүрдүүлэх чадвар
    Ногоон хөгжил Сэргээгдэх эрчим хүч, Ногоон технологийн инженер Экологийн мэдлэг, техник сэтгэлгээ

    Ирээдүйд амжилттай байхад шаардлагатай ур чадварууд

    Дижитал ур чадвар

    Өнөөдөр бараг бүх ажил дижитал орчинд шилжиж байна. Програм хангамж, өгөгдөл, интернет орчинд ажиллах чадвар бол орчин үеийн “суурь бичиг үсэг” гэхэд болно. MS Excel, CRM, AI хэрэгслүүд зэрэг энгийн мэт програмуудыг бүрэн ашиглаж чаддаг байх нь таны ажлын бүтээмжийг нэмэгдүүлж, албан байгууллагуудад үнэлэгдэх чухал ур чадвар юм. Мөн өгөгдөл задлан шинжилж, үр дүн дээр нь үндэслэн шийдвэр гаргах чадвар нь бизнес, маркетинг, менежмент гээд бүхий л салбарт нэн шаардлагатай болжээ.

    Бүтээлч сэтгэлгээ 

    Маш сайн боловсруулсан санаа, шинэлэг шийдэл нь таныг бусдаас ялгаруулдаг гол давуу тал болно. Бүтээлч сэтгэлгээ гэдэг нь зөвхөн уран зураг, хөгжим гэх мэт урлагийн салбарт хамаатай биш та аливаа асуудлыг уламжлалт аргаар биш, өөр өнцгөөс харж, илүү үр дүнтэй, шинэлэг гарц санал болгох чадварыг хэлж буй.

    Шийдвэр гаргах, асуудал шийдэх чадвар

    Хөдөлмөрийн зах зээл хурдтай өөрчлөгдөж буй энэ үед тогтсон заавар, дүрэм бүгдэд нь тохирохгүй байх нь олонтаа. Ийм үед та асуудлыг хурдан ойлгож, дүгнэлт хийж, шийдэл гаргах чадвартай байх шаардлагатай. Тухайлбал, багийн ажил гацсан тохиолдолд тухайн нөхцөлд хамгийн оновчтой гарц хайж олдог, хариуцлагатай, ухаалаг ажилтан байж чадвал та салбартаа үнэ цэнтэй мэргэжилтэн болох боломжтой.

    Харилцаа ба багаар ажиллах

    Орчин үед ганцаараа амжилтад хүрэх гэдэг ойлголт улам бүдгэрч, оронд нь хамтын амжилт чухал болж байна. Та өөрийн бодлоо ойлгомжтой, эерэг хэлбэрээр илэрхийлж, бусдыг сонсож, хамтран ажиллаж чаддаг байх ёстой. Энэ нь зөвхөн үг ярианы чадвар бус сэтгэлзүйн уян хатан байдал, ойлголцол, хүндлэлийг ч хамарна. Ялангуяа олон улсын багтай ажиллах үед соёлын ялгааг ойлгож, харилцаагаа уялдуулах чадвар чухал юм.

    Өөрийгөө тасралтгүй хөгжүүлэх хандлага

    Амжилттай хүмүүсийн хамгийн том нийтлэг шинж бол тасралтгүй суралцах эрмэлзэл юм. Ажлын байртай байсан ч, шинээр ажил хайж байгаа ч хамаагүй дэлхий өөрчлөгдөж байгаа учраас бид ч өөрчлөгдөх шаардлагатай. Өдөр бүр шинэ мэдээлэл унших, онлайн курс үзэх, туршлага хуримтлуулах нь таны ирээдүйн үнэ цэнийг нэмэгдүүлнэ. Суралцахаа зогсоох эсвэл хангалттай гэж бодох нь боломжуудыг дагаж ирэх амжилтаа хязгаарлаж буй хэрэг юм.

    Тэгвэл хэрхэн бэлтгэх вэ?

    1. Онлайн сургалтад хамрагдах

    • Coursera, EdX, Udemy, HubSpot зэрэг олон улсын платформ дээрээс

      • Data Science, UX/UI Design, Coding, Digital Marketing зэрэг өөрт тохирох төдийгүй сонирхох чиглэлүүдээр суралцаарай. Энэ бол цагаа бүтээлчээр, үр дүнтэй ашиглаж өөртөө хөрөнгө оруулах боломж юм.

    2. Карьерын замналаа тодорхойлох

    • Та яг юу хийх дуртай вэ?

    • Таны сонирхол аль салбарт илүү хэрэг болж чадах вэ?

    • Таны мэргэжил 10 жилийн дараа зах зээлд байх уу? эдгээр асуултуудад үнэнчээр бас бодитоор хариулах хэрэгтэй.

    3. Хувийн брэндээ хөгжүүлээрэй

    • LinkedIn, Lambda дээр өөрийгөө зөв танилцуул, profile-аа хөгжүүлэх

    • Сургалтын сертификат, hard болон soft ур чадварууд, ажилласан төсөл зэргийн мэдээллээ хуваалцаарай

    • Ингэхдээ зорилготой, мэдлэгтэй, хөгжиж буй талент гэдгээ тод илэрхийлээрэй

    Ирээдүйн зорилгоо амжилттай төлөвлөхийн тулд эхлээд өөрийгөө одоо яг хаана байгааг ойлгох хэрэгтэй. Энэ нь таны ур чадвар, мэдлэг, туршлага, үнэт зүйлсийг эргэцүүлэн дүгнэх үйл явц юм. Дараа нь өөрийн давуу болон сайжруулах шаардлагатай талуудаа тодорхойлж, хаашаа хүрэхийг буюу 5-10 жилийн дараах мэргэжил, орлого, амьдралын хэв маягийнхаа дүр төрхийг гаргаарай. Тэр зорилгодоо хүрэхийн тулд шат дараалсан төлөвлөгөө гаргаж, суралцах шаардлагатай зүйлс, хөгжүүлэх ур чадвар, хуримтлуулах туршлагаа тодорхой болгох юм. Энэ бүхнийхээ явцад өөрийн хувь хүний хөгжлийг тогтмол хянаж, шаардлагатай бол төлөвлөгөөгөө шинэчилж, улмаар өөрчлөлтөд уян хатан хандах нь урт хугацааны амжилтад хүрэх чухал алхам болох болно.

    Өнөөдрийн нэг алхам таны маргаашийн амжилтын үндэс юм.

    “Ирээдүй бол бэлтгэлтэй, зорилготой хүмүүст зориулсан шагнал билээ.”

    Зарим мэдээллийн эх сурвалжууд: World Economic Forum (WEF) – Future of Jobs Report, LinkedIn Economic Graph & Future of Work Insights, McKinsey Global Institute – Jobs Lost, Jobs Gained, OECD Skills Outlook, World Bank – Digital Jobs for Youth Reports

    Илүү олон зөвлөгөө, карьер хөгжүүлэлтийн мэдээллийг манай LAMBDA платформоос аваарай 

  • Төгсөгчдөд зориулсан анхны ажлаа олох зөвлөгөө

    Төгсөгчдөд зориулсан анхны ажлаа олох зөвлөгөө

    Их, дээд сургуулиа төгсөөд амьдралын дараагийн шат руу алхан орох мөчдөө “Одоо би яах вэ?”, “Хаанаас эхлэх вэ?” гэх зэрэг асуулт олон залуусын бодолд эргэлддэг. Туршлагагүй учир байгууллагуудад хүлээн зөвшөөрөгдөхгүй байх вий гэсэн сэтгэл түгшилт, итгэл алдрах мэдрэмж төрөх нь гарцаагүй. Гэхдээ санаа зовох хэрэггүй. Учир нь тохиромжтой ажлаа олох нь сайн бэлтгэл, мэдээлэлтэй байх, тууштай байдал зэргээс хамаарна.

    Энэ нийтлэлдээ төгсөгчдийг анхны ажлын байр руу хөтлөх 7 алхмыг зөвлөгөө болгон хүргэж байна.

    1. Өөрийгөө таньж мэд

    Ирээдүйн карьерын суурь бол чи өөрөө. Анхны ажлаа олохын тулд хамгийн түрүүнд хийх ёстой зүйл бол өөрийгөө ойлгох юм. Сэтгэлд нийцээгүй ажил хийх нь цаг хугацаа, эрч хүчний гарз болдог. Иймд:

    Ямар чиглэлд ажиллахыг хүсэж байна вэ?
    Тухайлбал: Хүний нөөцийн менежмент, маркетинг, програмист, нийгмийн ажилтан гэх мэт.

    Чи ямар чадвартай вэ?
    Сургуулийн төгсөлтийн ажил, клуб, сайн дурын ажил, дадлага зэргээ эргээд харах.

    Ажлын орчин, байгууллагын соёл чухал уу?
    Том корпораци, групп компани, дунд түвшний бизнес, эсвэл стартап гэх мэтээс аль чамд тохирох вэ?. Мэргэжлийн зан төлөвийн тестүүд (MBTI, DISC) бөглөж, өөрийгөө илүү гүнзгий ойлгож болно.

    2. CV/Resume болон Cover Letter

    Хамгийн эхний сэтгэгдэл төрүүлэх танилцуулга, хамт илгээх “би яагаад энэ ажилд тохирох вэ?” гэдгийг илэрхийлэх захидлаа маш сайн боловсруулж бичих хэрэгтэй.

    Resume бичихэд анхаарах зүйлс:

    • 1-2 хуудаст багтаах хэрэгтэй 

    • Төгссөн сургууль, мэргэжил, голлох хичээлүүдээ дурдах

    • Дадлага, төслийн ажил, сайн дурын туршлага гэх зэрэг мэдээлэл

    • Чадварууд (Excel, Photoshop, багийн ажил, илтгэх ур чадвар гэх мэт)

    Cover Letter зөв бичих тухайд:

    • Яагаад энэ байгууллагад ажиллахыг хүсэж байгаагаа тодорхой тайлбарлана.

    • Өөрийн туршлага, ур чадварыг ажлын байрны шаардлагатай холбож бичээрэй.

    3.  Ажлын заруудыг идэвхтэй хайх

    Ажил хайх платформ, мэдээллийн сувгуудыг тогтмол шалгаж, өөрт тохирсон боломжуудыг судлаарай.

    Өдөрт дор хаяж 30 минутыг зар хайхад зориулах нь зүйтэй. Lamda.global нь хиймэл оюун ухаан ашиглан таны анкетыг судлан үзээд, мэргэжлийн өсөлт хөгжилд тань тохирох карьерийн чиглэлүүдийг тогтоож, тэдгээрт хүрэхэд шаардлагатай ажлын туршлага, мэргэжлийн болон хувь хүний ур чадварууд, мөн шаардлагатай боловсрол, мэргэжлийн мэдлэгийг хэрхэн хөгжүүлэх талаар санал зөвлөмж өгнө.

    4.  Ментортой болох

    Шинэ төгсөгч та ажил, амьдралынхаа гарааг зөв эхлэхийг хүсэж байвал хамгийн түрүүнд ментортой болохыг зөвлөж байна. Туршлагатай ментор танд зөв чиглэлийг зааж, алдаанаас суралцах бус, урьдчилан сэргийлэхэд тусалж, карьерын өсөлтөд тань хурдасгуур болж өгдөг. Мөн ментортой байх нь зөвхөн мэдлэг туршлагаас гадна сэтгэлзүйн дэмжлэг, урам зориг авч, өөрийгөө хөгжүүлэхэд чухал нөлөө үзүүлдэг. Тиймээс та өөрийн хүсэж буй салбарын туршлагатай хүмүүсээс суралцах боломжийг ашиглаарай.

    5.  Богино хугацааны ажил, дадлагаас эхэл

    Хэрвээ шууд үндсэн ажил олох амаргүй байвал багаас нь эхэлж, алсыг хараарай.

    • Дадлага 

    • Гэрээт буюу түр хугацаанд гүйцэтгэх ажил

    • Сайн дурын хөтөлбөрүүд
      зэрэг туршлага хуримтлуулах замаар эхэлж болох юм.

    6. Ажлын ярилцлага

    Ярилцлагын үеэр өөрийгөө ойлгомжтой, итгэлтэй илэрхийлэх нь ажил олгогчид хамгийн чухал зүйл. Бэлтгэлгүй хүн сонгон шалгаруулалтаас хасагдах магадлал өндөр байдаг. Харин сайн бэлтгэлтэй бол амжилт тун ойрхон гэдэгт итгээрэй.

    Асуудаг түгээмэл асуултууд:

    • “Өөрийгөө товчхон танилцуулна уу”

    • “Яагаад манай компанид ажиллахыг хүсэж байгаа вэ?”

    • “Таны сул талууд юу вэ?”

    • “Хэцүү нөхцөл байдалд хэрхэн ханддаг вэ?” гэх мэт энгийн асуултуудад бэлэн байгаарай.

    7. Тууштай бай, шантралгүй урагшил

    Ажил хайх нь тэсвэр тэвчээр, тууштай байдлыг шалгах марафон юм. Зарим хүмүүс анхны ажлаа сарын дотор олдог бол зарим нь 3-6 сар, бүр түүнээс ч удаан хайх тохиолдол байдаг. Анхны ажил бол туршлага хуримтлуулах, танилын хүрээгээ үүсгэж тэлэх, мэргэжлийн карьерын суурийг тавих чухал алхам юм. Өөртөө итгэж цаг гарган, өдөр бүр 1% ч гэсэн ахиц гаргаснаар таны хүсэл мөрөөдөл биелэхэд улам ойртсоор байх болно.

    CV-гээ lambda -гын AI-р шинэчилж, талентаар бүртгүүлээрэй. Дараагийн ажлаа амжилттай олоход тань бид тусална.

    Холбоотой нийтлэл унших: CV-гээрээ ялгарч, ажилд орох боломжоо нэмэгдүүл